Maklumat Produk
Description
MAKLUMAT PRODUK
邊度最多鬼? 人心入面最多鬼…… 點解你覺得鬼恐怖? 因為鬼喺變成鬼之前,都係人…… 一個窮道士,同你講最有血有肉嘅鬼故事。
藍橘子 著有《同病唔使相憐,有病睇醫生》、《無病你呻乜嘢吟》、《Bad Time Story 港產童話》等,不停寫作,目標是將荒誕奇怪的故事嵌進讀者的腦裡。若你喜歡怪人,其實我很美。
KANDUNGAN BUKU
我猛咁咳,咳到差唔多窒息,阿公用手撥開啲嘔吐物,拎起咗一束束頭髮。 「你畀隻女鬼上咗身,你連自己做乜都唔知啦。」 「你亂講,我只係想幫佢咋,我唔想殺咗佢啊!」 「幫?你點幫隻鬼啊?我叫咗你唔好搞咁多嘢,你受唔起㗎!」阿公走過嚟撳住我個頭。 「我想幫佢咋,你放過佢啦,佢好慘㗎…⋯」我突然間情緒崩潰,猛咁喊。 「你頭上面把火畀隻女鬼吹熄咗啊!」聽阿公咁講,唔怪得之前嗰晚,我感覺到有陣寒氣不斷吹我個頭啦。 「人間有法律,地獄有戒條,唔係人人可以幫鬼㗎,近得佢哋多,會吸晒你啲陽氣㗎。」 「企遠啲!」阿公叫我女朋友行開,再雙手壓實我個頭,好大聲咁喝我:「妳好同我出嚟啦!你再咁落去佢會畀妳整死㗎!」 「唔好啊阿公,佢好痛啊,你放過佢啦求吓你。」我都唔知自己講緊乜。 「佢想幫妳啫,妳害死佢嚟自己投胎,妳過唔過意得去啊?」阿公。 「我求吓妳走啦!唔好搞我男朋友啊!」我女朋友企喺房外面大嗌。 呢個時候,我突然間成個人都鬆晒,個感覺就好似搭完飛機打個呵欠,隻耳仔聽嘢清返嗰種感覺。 阿公放開手,又燒咗碗符水畀我飲。「飲完嘔乾淨佢,唔好畀佢有嘢留低,買返嚟啲衫褲,牀鋪枕頭全部燒晒佢。」 飲完符水,我足足嘔咗三次,終於唔係嘔啲深綠色好似異形口水嘅嘔吐物。阿公就同我女朋友拎晒所有有關個女仔啲嘢落樓下,話搵個地方燒咗佢。 「你喺度休息吓,唔好再接近佢。」阿公唔畀我跟埋落去。 全屋剩返我一個,我瞓咗喺張無牀墊嘅牀上面休息。突然間,個Siri又再響起!我拎起部電話一睇,見到…⋯ 「後會有期。」